Salone Piyaa

Mere piyaa sanwale salone hain,
We bal buddhi aur guno ki khaan.
Aur mere is shareer ke kaleje hain.
Salone piyaa mere dil ke raja hain.
Priy kyon na hon?
Kyonki Shriram,Shrikrishna bhi to sanwale the.
Piya ko dekhkar main kho ati hoon is kadar,
Ki unke manmohak roop se hattee hi nahi meri najar.
Suhagrat ko jab unse meri bhent huee to,
Main unhe dekhte hi anandvibhor huee.
Unkee meethee meethee baton se mujhe maadak ehsaas hone lagaa,
Aur main unke sparsh se hi madhosh ho gayee.
Kaise kahoon ki wo pal bhi jaise thahar gaya tha,
Us raat pyar ka rang bhi gahraa tha.
Us raat main tan man se unke prati samarpit thi,
Kyonki main hoon unki ardhaanginee.
Saat janmon ka unka mujhse rishta hai,
Isliye main hoon unki jeevansanginee.
Main ishwar se hamesha prarthna karti hoon ki,
We hamesha jindagee ke har mod par kamyab hon.
Wo hamesha khush rahein aur safltaa unke kadam choome.
Kyonki unki haar mein meri haar,
Unki jeet mein meri jeet hai.
Main unhe apni aakhon ke saamne,
Jindagee bhar sahi salaamat chaahtee hoon.
Bhale hi uske liye,
Mujhe apni jindagee kurbaan karni pade.
Maine ki hain kaee galtiyaan,
Jise unhone hanskar ansunaa kiya hai.
Mujhe apnaa jeevansathi mankar mere,
Berang jeevan ko rangeen banaa diya hai.
Ishwar se main yahi prarthnaa karti hoon ki,
Hamaaraa paawan rishta janmon janmon tak amar rahe.
Prasann ho vidhata mujhpar itnaa ki,
Meri maang ka sindoor hameshaa ujaagar rahe.

Hindi Shayrees

Hey ishwar, aap to hain karunanidhan.
Jo jag mein rakhte hain sabkaa dhyaan.
Mere is hriday mein aap sadaa waas kijiye,
Banke mere shareer ke praan.

Aap meri jindagi mein khushiyon ki bahaar lekar aaye hain.
Jiske bina jhulas rahi thi meri rooh wo fuhaar lekar aaye hain.
Naseeb hota hai jo kisee kisee khushnaseeb ko,
Meri jindagee mein wo mahktaa aseem pyaar lekar aaye hain.

Lataaon ki ot se prakat huye aise Raam.
Prakate ho chandra jaise meghon ko hataake.
Naino ki dagar Siyaa rakhe Ram,
Kare Prarhnaa palak giraake.
Lakshminarayan awaak aise dekh rahe,
Mile the kahaan ab mile kahaan aake.

Jaise nadee parvat se nikaltee hai aur parvat mein hi samaa jati hai.
Jaise muskuraahat hothon se nikaltee hai aur dil mein samaa jati hai.
Usi tarah aapka pyaar mere rom-rom mein samaayaa huaa hai.
Mujhe rah rahkar aapki bahut yaad aati hai.

Sangeet wah swar hai jo hriday se nikaltaa hai.
Pyaar se chhoone par to patthar bhi pighaltaa hai.
Ai khudaa mujhse kisi ka dil na toote,
Kyonki toote dil ka jakham sirf pyaar ke marham se bhartaa hai.

Roj ham unse apne pyaar ka ikraar karne jaate hain.
Lekin unki maasoomiyat ko dekhkar ham laut aate hain.
Unse beintahaan pyaar karte hain ham,
Dil ki yahi baat ham unse chhipaate hain.

Dosti ki shuruaat hoti hai par ant nahi hota.
Jiske dil mein pyaar na ho wo insaan nahi hota.
Agar is jahaan mein sabko sachchaa pyar naseeb hota,
To kiseeka dil kisike pyaar se bejaar nahi hotaa.

Jaise bhanvaraa keval kalee kaa raspaan kartaa hai.
Jaise ambar keval dhartee ka aalingan kartaa hai.
Waise hi ai mere jaan se pyaare hamsafar,
Mera dil aapse beintahaan pyar kartaa hai.
Jab chhanmatr ke liye bhi aap meri aankhon se ojhal ho jaate ho to
Mera man aapki ek jhalak paane ke liye tarastaa hai.
Aapke sparshmatr se hi mere man mein ho jati hai ajab si halchal,
Tab aapke pyar mein pagal mera ye dil mujhse lakh sambhale nahi sambhaltaa hai.

Piya Kaa Aangan

Dekha karti thi main bachpan se ek sapnaa ki,

Jaaungee main ek din apne piyaa ke angnaa.

Piya ke liye hi hoga mera solah shringar,

Jo layega mere tan man mein nikhar.

Piya ke sparshmatr se hi mere gaalon mein hayaa ki laalee simat jayegi

Piya kaa pakar meri berang jindagee sanwar jayegee.

Muskuraahat

Hothon pe muskaan khil jati hai meri,

Uski ek sharaarat se.

Aankhein chamak jati hain meri,

Uski ek aahat se.

Uski ek jhalak pate hi,

Mera ang ang sajeev ho jaata hai.

Mera udaas man bhi,

Uske sparshmatr se praffukit ho jata hai.

Pataa nahi usme kyaa,

Visheshtaa chhipee hai.

wo mere is andhkaarmay jeevan mein prajalit huee,

ek jagmagaatee roshnee hai.

Uski aankhein hameshaa bolti hain,

Uski baatein mujhe toltee hain.

Uski mand mand muskuraahat,

Uske dil me chhipe raaj kholtee hain.

Khush hai wo mere hothon ki muskurahat se.

Main bhi uski ek muskurahat ke liye taras jati hoon.

Ishwar kare ki hamara ye rishta itna majboot ho jaaye ki,

Ham dono har khushee ka swaagat muskuraahat ke saath karein.

Dil Ki Tanhaaiyaan

Tanhaiyon se ghir gayee hoon main.

wo jo kabhi hasrat bankar jagee thee mere dil mein.

Aaj mere pairon ki jangeer ban gayee hain.

Duniyaa se bilkul alag ho gayee hoon main.

Jab pratham bhent huee unse to.

mere tan man mein pyaree see anubhooti huee.

Unki aankhon mein dekhne ki himmat nahi thi mujhme,

par bhi unhe jee bhar ke dekhna chahtee thi.

Wo mand mand muskurate hue mujhse baatein karte.

Aur lagataar dekhte rahte mujhe.

Par main sankochvash unhe koi bhi jawaab nahi de paatee.

Us pal mujhe lagaa aise ki wo mujhe bahut pasand karte hain.

Us din ke baad unse roj hone lagee baatein.

In baaton ko sunkar unke prati lagaav bahut gahraa ho gayaa hai.

Lekin waqt ne sab kuchh ulatkar rakh diya hai.

Ab ghir gayee hoon main ek ajab si udaasee se.

Shaayad wo bhi ghir gaye hon tanhaaiyon se.

Aur bhar gayee ho rom rom mein unke udaasee.

Phir bhi man mein ye aas hai ki,

kabhi dukh ke badal chhantege aur hoga khushhaal savera

Vivaah - Romantic Poem

Vivah hota hai har ladki kaa sapnaa,

jisse usko milta hai jeevansathi apnaa.

Vivaah ki belaa bahut mangal hoti hai,

Jisme ashruon se aankhein sajal hoti hai.

Jeevan ke pranaysootra mein bandhkar,

Dono ban jaate hain ek dooje ke hamsafar.

Jahaan khushiyon ki manjil pane ke liye,

Chalnee padti hai gamon ki dagar.

Vivaah naa kewal do dilon kaa,

balki do parivaaron ka milan hota hai.

Jisme pyaaraa saa piyaa paakar,

har vivaahita ka jeevan safal hota hai.

Ye jindagi kaa wo haseen pal hai,

jab aap ek dooje ke dil mein bas jaate hain.

Ek dooje se jaraa si bhi dooree hone par,

Wo milne ke liye tadap jaate hain.

vadhoo saat janmon ke liye ho jaatee hai var ki,

chutkeebhar sindoor ke maang mein padte hi.

Beti ho jaati hai sadaa ke liye paraayee,

Mata pita ke kanyaadaan karte hi.

Saaton pheron ke hote hain saat vachan,

jo var vadhu ko jeevanbhar nibhaane padte hain.

Vadhu ko janmdata se door rahkar,

Jeevan ke dukh uthaane padte hain.

Jab aatee hai bidaaee ki ghadi,

tab aankhein aansuon se bhar jati hain.

Phat jata hai maan kaa kalegaa,

Babul ki aankhein bhi bhar aati hain.

Bhaiyaa bahan ke ujval bhavishy ki kaamnaa karte hain.

Bhabhi dulhan ke gale lagkar use saantvana deti hain ki,

Agar tu jaa rahi hai sasuraal,

to tere maan baap kaa main,

pooraa pooraa rakhoongee khayaal.

Ishwar ne kaisee reet banaayee hai ki,

vivaah ke baad ladki kaa ghar uske liye paraayaa ho jata hai.

Jis ajnabee ke saath usne phere liye,

uska ghar uskaa apnaa ho jaataa hai.

Ek taraf agar maan baap se bichhadne kaa dukh hota hai to,

Doosri taraf salone piyaa se milne ki umang aur badh jati hai.

Mahak uthtaa hai uskaa jeevan khushiyon se,

aur uske chehre ki aabhaa nikhar jaati hai.

Vivaah ek pyaaraa saa rishta hota hai,

jise pyaar se nibhaayaa jaata hai.

Apne hamsafar ke ki khushiyon ke liye jeekar,

apna vaivaahik jeevan safal banayaa jaataa hai.

Atript Pyaas - Love Poem

Hai mere dil mein bas yahi aas ki,

kabhi to tripat hogi mere dil ki pyaas.

Kab wo din aayegaa jab main,

uske dil aur dimaag par chhaa jaaungee.

Kab wo haseen pal aayega,

jab main uski baahon mein simat jaaungee.

Bas jaaungee uske rom rom mein is tarah,

ki wo mere kareeb rahne ki dhoondhe wajah.

Jaane kab milegaa mujhe mere sapno kaa raajkumar.

jiske liye har pal main kiye baithee hongee solah shringaar

Uske bina bannaa sawarnaa lagtaa hai mujhe neeras.

Nahi achha lagtaa mujhe kuchh bhi uske binaa.

Har pal wo mere saamne rahe,

isee abhilashaa mein chhalak jaate hain mere nainaa.

Usse milkar aisaa lagtaa hai ki,

jindagee mein gamon ki kamee hai.

Sambhaale sambhal nahi rahi hain mujhse khushiyaan,

aur aankhon mein bahaaron ki namee hai.

Wo hameshaa meri aankhon ki chamak banaa rahe,

Muskuraayein mere adhar uske saath se.

Wo mere chehre ki aabhaa ko barkaraar rakhe,

Aur nikhar jaaye meraa yauvan uske sparshmatr se.

Wo mere naino kaa kaajal bankar lahke.

Wo mere balon kaa gajraa banke mahke.

Wo meri choodiyaan banke khanake.

Wo meri paayal banke chhanke.

Ab uskaa intjaar karte karte,

ho rahi hain meri saansein khatam.

Chaah bas hai yahi ki wo,

piyaa ke roop mein mujhe mile janam janam.

Madhur Pranay - Romantic Poem

Pehlee baar dil ke najdeek hai dhadkan,

pehlee baar hain ye najdeekiyaan.

Ab mujhpar yun kismat mehrbaan hai ki,

aaj mere saath hain piyaa.

Chaahe jitnaa lambaa safar,

chaahe jitnee mushkil dagar.

Doongee saath tera main sadaa.

Itne ham kareeb kaise aa gaye,

dil ko kuchh pataa hi naa chalaa.

Virah Vyathaa - Sad Love Poem

Sun sun chandaa dukh mere man ke.

Jaa tu meraa prem patraa padh ke.

Preetam se kahiyo dukh mere man ke,

Pardesee piyaa ki yaad sataawe ho.

Deepawali - Festival Poem

Ashvinshuddhpaksh ko shuru hoti hai Navratri,

Jisme poojee jati hai maan Jagdambaa , Bhavani aur Jagdaatri.

Vijaydashamee arthaat asatya par satya ki vijay,

Jisse satyawan log bane rahein nirbhay.

Vijaydashmee ke pashchaat aataa hai Karwachauth,

Karwa arthaat mitti ka ghadaa jise pyaar se sajaayaa jata hai.

Pati ki lambee umar ke liye vrat rakhkar,

Jeewan safal banaayaa jata hai.

Kartik maheene mein aataa hai deepon ka tyohaar,

Jise Bharatwasee kahte hain Deepawali.

Deepon ke is tyohaar se bhar jati hai dilon mein raonak,

Aur jeevan mein khushhalee.

Deepon ka ye tyohaar bahut hi niraalaa hai,

Kyonki mitaataa hai ye andhkaar aur phailaataa jeevan mein ujaalaa hai.

Jab huee Shree Ramchandra ki Ayodhyaa wapasi,

Tab bahut anandvibhor huey Ayodhyaawasi.

Ayodhyaawasiyon ne deepon ko jalaakar prakat ki apnee khushiyaan,

Yugon yugon se is reeti ko duhraatee aa rahi hai ye duniyaa.

Jab amrit praapti hetu saagarmanthan kiyaa gayaa,

Praapt huye anekon ratn aur Vishnupriyaa.

Vishnupriyaa arthaat Mahaalakshmee ne jab Shree hari kaa varan kiyaa,

Devtaa bahut prasann huey aur Shree hari aur Mahaalakshmee ko naman kiyaa.

Deepawali ko Mahaalakshmee ke janamdin ke roop mein manaayaa jata hai,

Kyonki Mahaalakshmee ki kripaa se hi jeevan sukhon se bhar jata hai.

Agar Shree hari Jagat Paalak hain to Mahaalakshmee raajasjananee hain,

Chaaron or hoti hai kalaakriti Rangolee ki,

Khooshboo se bhar jata hai man Chakalee, Karanjee ki.

Chaaron or chaaee hoti hai pataakhon ki dhoom,

Jisme log pasand karte hain honaa gum.

Kandeel ko dekho to aisaa lagtaa hai ki aasmaan me taaraa jagmagaa rahaa hai,

Is tyohaar mein hum, tum hi nahi saaraa jahaan khushiyaan manaa rahaa hai.

Yugon yugon tak log is paavan parv ko manaate rahenge,

Shree hari aur Mahaalakshmee ke gun gaate rahenge.